SARANGGOLA
Bakasyon,
tuyong-tuyo ang bukirin.
Gumawa kami ng saranggola ni kuya.
Tuwang-tuwa kami
habang pinagmamasdan ang tila
malaking ibon sa himpapawid.
Hindi nagtagal,
nagkasundo kami ni kuya.
Binitawan niya
Ang pisi ng saranggola.
Gumewang-gewang ito at tinangay
ng hangin papalayo.
Naghiyawan naman kami
Habang hinahabol
Kung saan ito lalapag.
Kapwa kaming humihingal
na umupo sa pilapil ni kuya.
At habang naglalakad
pabalik ay magtatawanan,
habang iwinawagayway ni kuya
ang nawarak na saranggola.
PAMIMINGWIT SA SAPA
Tuwing mag-aararo si Tatay
sa aming bukid sa kabilang sapa,
sumasama kami ni kuya.
At habang nag-aararo siya,
mamimingwit naman kami.
Napapatili ako kapag
nakakabingwit ng dalag at tilapya.
Ganoon din si Kuya kapag
nakakabingwit ng hito at martiniko.
Magtatanghali na kami uuwi.
Kanya-kanyang bitbit kami ni kuya
sa tinuhog naming
mga nabingwit na isda.
Sabik na sabik naman kami
habang pinagmamasdan
ang pumupusag-pusag na mga isda
na halos sumayad na ang dulo sa pilapil.
At ilang sandali pa ay magiging
Laman ng aming sikmura.
TUTUBI AT PARU-PARO
Kapag magpapastol ng kalabaw siTatay,
sumasama kami ni kuya.
Lalo na kapag walang pasok
sa eskuwela.
Tuwang-tuwa kami ni kuya
habang nakasakay sa likod ng kalabaw
Malawak ang parang
na pinagpapastulan ni tatay.
Maraming halamang namumulaklak,
kaya maraming umaali-aligid
na mga tutubi at paruparo.
Magtatago muna kami ni kuya
sa malagong halamanan,
kapag may napansing tutubi
na nakadapo sa dahon o sanga.
Dahan-dahan naming lalapitan
at huhulihin sa buntot.
Mas mailap ang mga paru-paro,
kaya binubulabog na lang namin.
Maghihiyawan naman kami ni kuya
habang hinahabol
ang papalayong mga paruparo,
na ibat-iba ang kulay at laki.
TUNGKOL SA MAY AKDA
Ang may akda na si Shur C. Mangilaya ay makata at kuwentista na tubong Bagacay, Ibajay, Aklan. Ang kanyang mga akdang tula at maikling kuwento ay nalathala sa Liwayway, Pang-Masa, Madyaas Pen, Ani 36 at Ani 37 ng Cultural Center of the Phiippines.
