Tula ni Vict. V. De la Cruz (Unang nalathala: LIWAYWAY, Pebrero 20, 1961)
Ano ang pag-ibig? Palaman ng isip Malamig-mainit Kay-hirap malirip Laya ay kung bakit Gapos ng pasakit Mutyang pumapangit Sa pananaginip Minsang nagngangalit Napakaligalig Bituin sa langit Magandang panganib Ang hugpungang-guhit Iba’t ibang hugis.
Pag-ibig ay ano? Alak na panlango Sulak at silakbo Kaba, kutob, sikdo Nagpapakalito Sa paghihinampo Kapagka natukso Ng kislap at bango At nagsasa-bagyo Huwag di mabuyo Munting gamugamo Nagpapakaabo Sa buhay na ito Tamis, buhay, apdo!
Tuwa, kalungkutan Galak, kalumbayan Lugod, kahapisan Ng puso at buhay Masawi kung minsan Na di maiwasan Sa ibang kandungan At kaligayahan Pag nilapastangan Sa palasintahan Nagbabagong Araw Ang kapangyarihan Sa katotohanan: Walang kamatayan!
