Ni Lawrence Andrew G. Basallote Dito ko itinatago Lahat ng alaala ko sa ‘yo, Sa gitna ng hapag-kainan Na tanging ako lang ang nakaupo. Sa tuwing nais kitang makita, Dahan-dahang bubuksan At iaangat ang takip nang bahagya —kundi sasabog ang laman At iyong malalaman Na nag-aalboroto pa rin ang bulkan. Kukuha lamang ng isang dakot Ng pagmamahal at isusubo, Babalik na ako sa araw na Una kang namasdan. Ikinagagalak kong ipaalam sa ‘yo Hangin na lang ang natitira rito.
