Pananaginip

Ni John Carlo S. Gloria

I.

Nilalagot ko ang buhol na pisi

sa buntot ng bulalakaw,

kasabay ng sariling paghabi

nitong mga salita ng pagtangi

sa dating damdaming nalusaw.

Hilera ng imahen mo ang lumilitaw

sa pagitan ng mga sansaglit.

Naglalaho-nagbabalik:

Mapanghimasok na alabok nitong tadhana.

Kaya sa iyong dibdib

Marahan kong itinuturok itong balaraw

nang magising sa pagtulog kong mababaw.

II

Minamanhid ako

ng paulit-ulit na pagdama,

ng aparisyon ng mga alaala,

at ng di mawaring paglalaho ng sigla.

Hubad akong may-sugat-na-di-magpipilat.

Ulit-ulit na natutungkab subalit hindi masalat.

Ako ang mismong saksi

sa biktimang bangkay ng sarili.

III

Nagsasadagat akong nililikas

itong baybayin

At nanunumbalik na panibago

sa piling ng batuhang buhangin.

Humahalik sa parehong pares

ng paa ng paghihintay.