Ni BIENVENIDO A. RAMOS
(Unang nailathala: LIWAYWAY, May 27, 1963)
i.
Nakatawa
ang elena
at sa madlang nanonood ay may ngiti,
at ang bawa’t mangitia’y nagbubunyi;
Natupad na
ang panata:
di-iilan ang hinalaw na dalaga,
sa nalabi ay siya rin ang napita;
May pighati
ang lunggati
kung di siya ang napiling maging reyna…
(yao’y hindi malilimot na sandali!)
ii.
Naluluha
ang matandang
nagmamasid sa elenang nagdaraan—
ang mithi ng anak niya’y napagbigyan!
natutuwa’t
kahit dukha,
anak niya ang sagalang itinanghal—
puring-puri sa magandang kasuotan!
Maharlika
at pasadya
ang sa reynang baro’t sayang kumikinang
na katumbas ng bakurang isinanla!
