Ni JUAN C. BUGARIN
(Unang nailathala: LIWAYWAY Hulyo 24, 1950)
May unos sa laot, may bagyo sa dagat,
Ang Bapor ng Bansa’y hindi makausad;
Nanggaling sa digma, may dalang watawat,
Na sa papawiri’y wawasi-wasiwas!
Sa digmaang iyon ng kislap ng diwa,
Napamulaklak din ang ating Paglaya;
Sa digmaang yaon ng dugo at luha,
Nabigyan ng dangal ang sariling Lupa.
Ngayo’y naglalakbay na Laya ang baon,
Tinutungo’y Lupang Pangako ng Layon;
Doon sa may gitna’y nagbabangong alon,
Na sa ating Bangka’y ibig sumalubong!
Ang tanong ng ilan: Saan kaya tayo
Isasadsad ngayon ng ating Piloto?
Sa Parolang Ginto’y may Ilaw-talino,
Muling magwawagi tayong pilipino!
