Ni CATALINA P. FAJARDO
(Unang nailathala: LIWAYWAY, Hunyo 24, 1946)
Ang buhay ng tao dito sa sinukob
Minsa’y maligaya kung minsa’y malungkot;
Guhit ng palad kong sa ligaya’y kapos
Kasabay ng mundo sa kanyang pag-inog.
Ang buhay ay ganyan sa mundong ibabaw
Minsa’y matapat ka sa kaligayahan;
Ang buhay ng tao na animo’y ilaw
Minsan maliwanag, kung minsa’y malamlam…
Sadyang ganyan yata ang buhay na angkin
Ang ninanais mo’y mahirap na kamtin;
At sa paghahangad ng ligaya’t aliw
Madalas maligaw sa maling landasin.
